Kumpulan Syairan Sunda

Yasana: Arrsyii Imam Ghifarie

Ku solawat dikawitan
Abdi ngadamel syairan
Étang-étang ngahiburan
Sakantenan mépélingan

Pasosoré sing talongkrong
Lohor waktu mah nyangkolong
Ari peuting tudang-todong
Isuk saré kawas kalong

Nalongkrong di hiji warung
Jeung batur bari ngariung
Katingal patinggumulung
Nya kitu ngadon baringung

Ceuk urang mah sing rumasa
Hirup téh puguh teu boga
Lagana kos jalma kaya
Padahal dompétna rata

Jajan gé ménta ka kolot
Méntana sentak polotot
Kadang lamun eukeur angot
Acis kolot kot dicokot

Leuheung lamun boga gawé
Da pokna gawé mah capé
Padahal atuh ngaku wé
Manéh géngsi ku awéwé

Ku pédah gawéna macul
Atanapi kuli panggul
Kapan moal matak bisul
Tamba cicing acisna ngumpul

Kalakuan lalaki mah
Tara sok betah di imah
Komo dititah ka sawah
Némbalanna wararegah

Ari acis hayang aya
Nu ngalanna indung bapa
Jalma téh euweuh kaéra
Ka kolot bet punta-pénta

Istrina gé teu ngartikeun
Ceuk urang mah jarurungkeun
Lalaki pasti nurutkeun
Lamun teu nurut pegatkeun

Ari urang mah sukuran
Muji sukur ka Pangéran
Gawé mah ulah géngsian
Sanajan kuli bangunan

#Sajawa_Syairan_ImamGhifarie.