Kumpulan Syairan Sunda

Yasana: Kidangtlangkas.

Teuteundeunan ti Pangeran
Nu eusina ditujulkeun
Ka mahluk anu akalan
Akal taya kacacadan

Ku pamilih na sorangan
Pamilih nu ngahajakeun
Gunana pimaslahateun
Dunya jeung ka akheratan

Maslahat nu ka hijina
Ngaluruskeun aqidahna
Nya datang ajaranana
Elmu Aqoid ngaranna

Maslahat nu ka duana
Mereskeun cara baktina
Pribadi Ka Pangeranna
Rub'ul Ubudiah ngaranna

Maslahat nu ka tiluna
Ngajakan saluranana
Uteuk reujeung pamikirna
Malar sampurna akalna

Dilarang nginum mabokna
Atawa nyeuseup mabokna
Bisi lieur keur uteukna
Atawa lemah uteukna

Dipahing adu-aduan
Da matak panas pikiran
Matak panik kana angen
Antukna jadi seniwen

Maslahat nu ka opatna
Ngaping pausahana
Malar hasil jeung beresna
Henteu nyekek ka baturna

Teu meunang siligorengkeun
Atawa silihrugikeun
Maka haram panipuan
Tawa haram sistim ijon

Mumbul Rub'ul Muamalat
Mun dirempak matak lepat
Kana haram tisoledat
Jalan ekonomi ngaut

Lima ngajaga turunan
Ngukuhkeun ka pamilian
Jeung sina puguh rundayan
Asasi kamanusaan

Datang hukum pertikahan
Datang haram perzinahan
Nafaqoh kulawargaan
Ngahurmat ka saluhureun

Maslahat nu ka genepna
Jaga kana hak milikna
Haram maling jeung bangsana
Mangka datang jinayatna

Maslahat nu ka tujuhna
Jaga kahurmatanana
Haram ngupat jeung bangsana
Atawa nuding zinahna

Maslahat ka dalapanna
Ngajaga awak-badanna
Haram keur ngaguna-guna
Kana badan manusana.

#Syairan_Kidangtlangkas.

Yasana: Amung Aryandi Natanaragana Sunarya.

Kasedih Rosulna lajeng diupahan
Parentah ngadeuheus ka Hyang Maha Rohman
Ku ngalakonan Isro’ sareng Mi’rojna
Parentah ti Allah Bukti na Qur'anna

Lalakon Isro Mi'roj oleh-olehna
Nyaeta ibadah sholat nu ayeuna
Sholat mangrupakeun parentahan langsung
Nyata ti Gusti Allah Nu Maha Agung

Mimiti ibadah sholat teh kuduna
Dilaksanakeun lima puluh waktuna
Waktuna sapoe-sapeuting teu kurang
Rupina ku ayeuna pasti hareudang

Ngan dumasar piwejangna Nabi Musa
Kanjeng enggal ngadeuheus Allah Ta'ala
Pikeun ngurangan kana wilangan eta
Buktos Rosul ka umat banget ngabela

Nya antukna dugi kana lima waktu
Nepikeun ka ayeuna eta tos tangtu
Ibadah sholat teh dilaksanakeunna
Sapoe-sapeuting ngan lima Waktuna

Tah eta mangrupa hikmahna hikayat
Isro’ Mi’rojna Rosul pek geura toat
Tanpa perjuangan Rosul jeung Sohabat
Moal timu na kumaha kudu toat

Istilah jaman ayeuna mah Rajaban
Majar cenah kana gizi perbaikan
Kantenan perbaikan kana jasmani
Sabab ruhani dieusi elmu pasti

Pasti sehat jasmani saurang hamba
Ngalakonan parentah Allah Ta'ala
Usahakeun sholat tepat dina waktu
Sabab kudu kitu saur jalma timu

Sing timburu pami batur gura-giru
Kana sholat nuturkeun talajak guru
Nyanggakeun buah pikiran anu kotor
Hamba Allah elmuna masih bolongor

Seja ngapalkeun kana elmu ulama
Nata na raga ku nasehat ulama
Panungtungan sholawat miwah Salamna
Ka Rosulullah tur ka putra-putrina

Oge ka parashohabat nu bajoang
Siap mati angkat pedang siap perang
Ka Tabiin Tabiat dugi kiwari
Apalna mung papatah parakiyai.

#Sajawa_Syairan_AANS.

Yasana: Mama KH. Khoer Afandi.

Syahadat dua bagian
Kahiji Syahadat Syar’an
Kadua Syahadat Munjin
Kade kudu telik pisan

Ta’rifna Syahadat Syar’an
Kadar-kadar nu ngucapkeun
Kalimah Syahadataen
Henteu nilik patekadan

Mangpaat Syahadat Syar’an
Bisa disebut mu’minin
Mungguh hukum kadunyaan
Kaya halal peupeuncitan

Halal ditikahkeunana
Ka jalma anu Islamna
Jeung halal nampa warisna
Ti jalma anu Islamna

Ari mungguhing Allahna
Jeung mungguhing akheratna
Kudu terus jeung Munjinna
Engke penjelasanana

Kanjeng Nabi tos nyaurkeun
Anjeun kudu ngahukuman
Ku dohirna caritaan
Jeung dohirna kalakuan

Jeung teu kudu ngahukuman
Nu dina hate disimpen
Da taya nu uningaeun
Salian ti Dzat Pangeran

Lamun dohir kalakuan
Atawa dzohir ucapan
Aya anu ngabatalkeun
Nu disebut pamurtadan

Batal Syahadat Syar’anna
Sanajan ngucapkeunana
Kana kecap syahadatna
Laku ucap nu murtadna

Kaya asup ka gareja
Dibarengan ku ngahaja
Atawa nyembah berhala
Kaya patung nu baheula

Ta’rifna syahadat munjin
Eta jalma nu ngucapkeun
Kalimah Syahadataen
Dibarengan patekadan

Tekad anu ma’rifatna
Jeung tekad anu tashdeqna
Netepan kana syaratna
Ma’rifat reujeung tashdeqna

Ari syarat ma’rifatna
Kudu kumpul nu opatna
Kahiji tekad jazimna
Patekadan nu yakinna

Lain tekad nu raguna
Atawa dugaanana
Anu teu aya mang-mangna
Tapi gilig jeung yakinna

Ari syarat kaduana
Teu keuna owah gingsirna
Moal barobah tekadna
Hingga dugi ka maotna

Lamun nekadkeun ayeuna
Sabot usum jeung baturna
Jaga  kumaha engkena
Mumkin tekad rek robahna

Kafirna teh ti ayeuna
Da arek owah gingsirna
Henteu jadi ma’rifatna
Mungguhing Gusti Allahna

Syarat anu katiluna
Anu ditekadkeunana
Kudu akur jeung buktina
Henteu nyalahan sifatna

Sifat ceuk shli sunnahna
Nu aya Qur'an hadistna
Teu salah metakeunana
Akur reujeung ‘Aqo’idna

Margi kitu diwajibkeun
Nu hayang Syahadat Munjin
Nyahona ‘Aqo’id Iman
Bisi ‘Aqo’id nyalahan

Lamun jazim jeung teqadna
Yen Allah Pangeranana
Yen Muhammad teh rusulna
Ngan teu akur jeung buktina

Allah nu nyurup na badan
Bumi langit panyurupan
Di dinya Allah nyicingan
Atawana dihijikeun

Eta tekad nyulayaan
Reujeung buktina Pangeran
Da Allah henteu butuheun
Kana tempat pingancikeun

Nu kitu salah tekadna
Henteu akur jeung buktina
Henteu sah Iman-Islamna
Mungguhing Gusti Allahna

Syarat anu kaopatna
Kudu terang na dalilna
Anu teu terang dalilna
Eta teu sah ma’rifatna

Ari ceuk Ibnu ‘Arobiy
Jeung pendapat Syeh Sanusi
Anapon ceuk Syeh Dasuki
Taya dalil Ma’rifat jadi

Dalil kadar kawajiban
Lain syarat kama’rifatan
Pikeun jalma nu kadugaeun
Kana dalilna mikirkeun

Kadua Syahadat Munjin
Kudu tashdeq nu ngucapkeun
Tashdeq aya dua rukun
Kahiji rukun Idz Dzi’an

Idz Dzi’an eta ngakukeun
Ka Allah kuring mangeran
Ku Muhammad dinabian
Nabi anu ahir jaman

Rukun tashdeq kaduana
Nyaeta kudu Qobulna
Narima ajaranana
Ti Allah jeung ti Rusul-Na,

Mun can bisa ngalakonan
Tapi hate mah nampanan
Rumaos kalelepatan
Eta qobul sahna Iman.

#Sajawa_Syairan.

Yasana: Amung Aryandi Natanaragana Sunarya.

Isro Mi’roj dua kecap asalna mah
Basa Arab anu jelas hartina mah
Lafadz Isro’ eta anu kahijina
Lafadz Mi’roj eta anu kaduana

Wincikan harti dua kecap nya eta
Urang ngisahkeun kajadian baheula
Isro’ hartina lalampahan Mantenna
Dina waktu peuting eta terjadina

Lalampahan ieu dilakonan Nabi
Nab Muhammad eta kakasih Gusti
Ti Masigit Harom nu di kota Mekah
Teu sambarang tangtu atsarna barokah

Ka Baitul Maqdis nu di Palestina
Ringkesanna mah nya kitu eta buktina
Sadaya ulama sapuk ngisahkeunna
Kitu isro' teh eta leumpang hartina

Hartina Mi’roj eta naek ka luhur
Memang kitu kabeh ulama tos nyaur
Ieu mah nuduhkeun kana lampah Kangjeng
Ti Aqso ka Sidrotul Muntaha lajeng

Ngadeuheus ka Gusti Allah buktosna mah
Eta dua tingkah Kangjeng teh amanah
Amanah kapercaya memang terjadi
Angas teu percanten Mi'roj kafir asli

Dilakonan dina waktu ngan sapeuting
Dina mangsa harita keur jemplang-jempling
Kajadian lumangsung dina waktuna
Taun ka dua belas janten Rosulna

Kangjeng Nabi nalika mangsa harita
Dina kaayaan kasedih nu nyata
Kangjeng Nabi Muhammad teh dikantukeun
Ku garwana Khodijah nu dimulyakeun

Oge ku Raden Abu Tholib pamanna
Atuh malah tambih-tambih kasedihnna
Nanging Rosul sobar nu taya hinggana
Uninga cocoba ti Nu Maha Kawasa.

#Sajawa_Syairan_AANS.

Yasana: Luqman Al-Hakim

Ulah poho ulah poho
Ulah daek kadodolo
Ulah daek dibobodo
Mun kafir nyumbang sembako

Ulah tega ulah tega
Hidep ulah lalawora
Lantaran barang teu pira
Bet ngagadekeun agama

Ulah kitu ulah kitu
Jelas kami teu satuju
Justru ulah ragu-ragu
Nolak sanajan dibendu

Kudu ngartos kudu ngartos
Mun palebah usum nyoblos
Sok loba nu nyumbang artos
Milih buron balik tergos

Nagara keuna kutukan
Di mamana kahurua
Akibat kadorakaan.
Kurang rasa kaimanan

Politik jadi utama
Asal jongjon kerjasama
Pamingpin teu ngilik rupa
Jalir ka paraulama

Jalma mu'min berjamaah
Ngadu'a bari gugurah
Ngajak rahayat ibadah
Menta dicap mecah belah

Palebah majlis ulama
Netela mastikeun patwa
Ka umat sangkan ngaraksa
Nu haram ulah dicoba

Lain sukur lain bungah
Aya papatah nu ngarah
Estu nganggap mawa resah
Dasar dayus haram jadah

Al- Qur'an reujeung ulama
Ditarok dihina-hina
Ninggang mah aya nu mela
Bangsa dayus kalah nyela

Abong nagri teu kawalat
Abong gunung teu maluncrat
Abong cai teu saraat
Abong can kungsi kiamat

Etaa teh akibat salah
Milih calon pamarentah
Tungtungna bijil kasusah
Juntrung-jentreng sagawayah

#Sajawa_Syairan_LAH.