Saniskara Sastra Sunda
Pedaran dipikareueus
-
Karya: Fahmy Sya'idan Ringkesna ieu nadhoman Carita lampah sorangan Sapanjang jalan ngalaman Pait peuheur kahirupan Bismillah mimiti muj...
-
Karya: Fahmy Sya'idan Dikawitan ku Bismillah Nadhom Sunda muga berkah Munggaran urang palapah Sholawat sugan ijabah Ninggang mangsa nu s...
-
Yasana: Dhee Al'ihsaniyahh Ma'rifatull Aulaa Kawit ngucap bismillahi Puji sukur ka Ilaahi Gusti Allah Mahasuci Pamilik langit j...
Ngeunaan Sim Kuring
Karya: Fahmy Sya'idan
Sadayana puji kagungan Illahi
Anu muhal seda tina purwadaksi
Pangéran sakabéh alam nu maranti
Nyanggakeun puji lisan tur sanubari
Mangsa siang caang padang narawangan
Nyambuang haleuang ku serat nadhoman
Malah mandar laksana jeung tinekanan
Maksad tina nyutat riwayat laratan
Mangsa bungah teu aya deui kajaba
Mayunan sasih tanda dipedalkeunna
Robi'ul awal wengi Senén saksina
Sumpingna jungjunan umat sadayana
Lembur matuh banjar karang pamidangan
Nyaéta Mekah tempat cukang lantaran
Medal Baginda Rosulullah jungjunan
Na mangsana seueur pisan kaanéhan
Hideungna méga lir nu patukangtonggong
Bray caang dugi ka sagala katémbong
Hayawan keur milu bungah silih pelong
Jeung katara ruksakna kabéh tapékong
Baginda Nabi Muhammad kakasihna
Ti Bani Hasyim nu katelah mulyana
Sayyid Abdullah anu janten ramana
Jeung Siti Aminah nu janten ibuna
Ari Rosul dina mangsa kakandungan
Dikantun ramana waktu genep bulan
Malah sapalih ulama misauran
Yuswa genep taun, ibuna nyusulan
Yuswa anomna janten pahatu lalis
Dikantun ibu-rama teu janten inggis
Horéng éta tos janten titis tinulis
Ti Gusti Alloh anu baris ngawaris
Maparinan kana tanda kanabian
Diangkatna janten Rosul akhir jaman
Waktos diangkat janten Rosul khotaman
Mangsa yuswana opat puluh taunan
Ari nu janten eusi caritaanna
Waktos Rosul sumping ka guha nyalira
Dicalukan ku sora teu aya rupa
Muringkak teras nyusul ka garwana
Sumping ka Siti Khodijah nepangan
Ngarenghap sekedap ras diharuduman
Nyarita yén kami utusan Pangéran
Siti Khodijah percaya teras iman
Mangrupa tugas pikeun Rosul sumebar
Umajak ka kaum nu kacida sasar
Nanging dakwah mimitina ngadumasar
Nyumput buni jeung sohabat Abu Bakar
Saparantos lami wantun di nu caang
Ngadakwahkeun Islam teu aya kamelang
Rosul ditampik, dihina, teras perang
Kapan aya Umar nu ahli pakarang
Dugi ka sumebarna agama Islam
Ku bajoang, kasobaran, sarta dawam
Nanjeurkeun agama teu geumpeur jeung hamham
Jalaran tumut ka Gusti mun dicaram
Masieup tur sarasi pikeun jungjunan
Jalmi nu pangmulyana tur hébat pisan
Hiji nonoman nu teu aya bandingan
Akhlak, weruh, sarta tina kasobaran
Baginda Nabi Muhammad anu punjul
Nu luhung lain harkat martabat wungkul
Nanging dina akhlak-akhlakna téh unggul
Keur nyaruaan éta dialak paul
Upama dijejelé tara gumedé
Henteu ngawaler ku sifat ngalélécé
Kantenan dugi ka wantun ngamomoré
Rosul mah sobar teras ngadu'a baé
Nyaahan ka fakir miskin tur ka yatim
Najan ka musuh Rosul mah tara lalim
Mulya sakujur badan jisim tur jirim
Tah kaagungan turunan Bani Hasyim
Kapan Rosul mah tara angob kajurung
Henteu kulem haténa najan salangkung
Méga di awang-awang janten tangtayung
Duh Rosul mah jalmi mulya sarta luhung
Nyaahna Rosul ka sadayana umat
Sakumaha Rosul nyaah ka sohabat
Dugi ka jaga mangsana di akhérat
Rosul unjukan keur maparin syafaat
Ya Rosululloh Nabi Salam Alaika
Nyanggakeun sholawat mugi kapercaya
Ya Rosululloh Nabi Salam Alaika
Ieu nadhoman mugia katarima
Mudah-mudahan urang tiasa nyandak
Kana hikmah lalakon Rosul nu nyampak
Nyanding pahala tur tiasa umajak
Maos nadhoman nu bakal jadi matak
Karya: Fahmy Sya'idan
Ringkesna ieu nadhoman
Carita lampah sorangan
Sapanjang jalan ngalaman
Pait peuheur kahirupan
Bismillah mimiti muji
Ka Gusti Robbul Izzati
Nu maparin rizki pasti
Ti kawit jaman Azali
Mangka mimiti ditulis
Ieu syair tanda tawis
Ti abdi anu kawaris
Sapait tur samamanis
Ieu téh mangrupa jalan
Jalan tina kacintaan
Kasedih jeung kabungahan
Geus jadi hiji patokan
Najan katalimbeng rasa
Nu mawa kana sangsara
Tapi teu aral subaha
Komo tepi ngadodoja
Gagal cinta geus ngalaman
Ku sabab disulayaan
Tapi éta pangalaman
Nu nganteur kadéwasaan
Mangsa bungah ogé pernah
Ngarasa genah tur betah
Tapi teu lami gé robah
Sabab syukurna gé salah
Kahiji gagalna cinta
Sabab tina ngarasula
Nurutkeun napsu akhirna
Jauh tina keur rumasa
Cenah keur mulus rahayu
Nepi ka poho ka waktu
Padahal beunang karayu
Nu nyuksruk kana bebendu
Karasa-karasa pisan
Peurihna disulayaan
Nya ka mana pamuntangan
Lamun lain ka Pangéran
Lain rék nyalahkeun batur
Kanyeri nu geus pacampur
Ieu téh sugan ditegur
Ku Nu Ngatur sabab paur
Jeung ieu samata-mata
Palajaran sangkan bisa
Ngatur kahirupan cinta
Dina tiap-tiap mangsa
Jalanna éta ku sabar
Nandangan nu tos gumelar
Kanyeri éta ilahar
Jeung jadi bahan diajar
Diajar nampi kanyeri
Sangkan bisa ngaji diri
Yén bagja bakal kaciri
Lamun urang ati-ati
Saléngkah bakal ditunjuk
Sakeupeul bakal dicaluk
Éta mangrupa piwuruk
Micinta nepi ka taluk
Jalaran ari lampah mah
Kumaha anu ngalaman
Di mana méré kabungah
Bakal meunang kabagjaan
Ngaranna ogé manusa
Teu leupas tina gogoda
Salahna éta biasa
Benerna ogé sarua
Tah geuning mun nafakuran
Tina jalan caritaan
Kabéh ogé palajaran
Keur kana kadéwasaan
Kadua nampa kabungah
Nu ceuyah dina milampah
Sanggeus nampa katugenah
Senang ngawit sumarambah
Nu ngeusi lalangit ati
Kiwari nyampak kaciri
Mawa cinta nu sajati
Mugia bisa ngahiji
Muka lawang nu sampurna
Muka lolongkrang ayeuna
Cohagna ngajalin cinta
Mugia geura laksana
Ngalaksanakeun kahayang
Nu baheula kungsi ilang
Di mana urang bajoang
Nata hirup susah-senang
Geuning ieu buah sabar
Dina nampa ieu qodar
Kanyeri bakal disinglar
Kabungah bakal sumebar
Nun Gusti panuhun ampun
Tina jalan tos ditungtun
Mugia abdi sing purun
Nandangan kisah ka payun