Ngeunaan Sim Kuring
Jumat, 30 September 2022
Karya: Fahmy Sya'idan
Najan teu sampurna pikeun ngarandapan
Mangka ieu sapucuk serat munggaran
Nyanggakeun jeung mugia kamanfaatan
Jalma kasipatan ku tara rumasa
Kana sagala nu geus dipilampahna
Teu paduli najan migawé sulaya
Nepikeun kacampur jeung aral subaha
Ti barang gubragna nepi ka mukallap
Jalma henteu leupas tina sipat hilap
Tina lakulampah jeung sagala ucap
Salah jeung doraka siga nu geus nerap
Apan éta mangrupa sipat adami
Nu ditampi sangkan urang ati-ati
Di mana rék milampah perkara pasti
Kudu akur jeung patokan sing taliti
Ulah nepi ka milampah sagawayah
Kapahung ngagugu napsu jeung amarah
Pan éta kacida pinuh ku cawokah
Hirup diatur napsu éta téh salah
Mangka aya dina paribasa ogé
Di mana mun melak hadé jadi hadé
Tah kitu ka hidep ulah sok talangké
Hirup genah lamun urang sok tanwandé
Najan migawé hadé henteu babari
Loba pisan gogoda nu nyiliwuri
Nanging ulah nepikeun poho jeung lali
Kana bendu mun teu ngawaro ka Gusti
Pan hirup mah geus aya dina aturan
Mangka cenah ulah ngawaro ka sétan
Milampah ibadah éta téh tujuan
Keur di dunya nu jadi pangumbaraan
Malah jelas pisan ku dawuhan Rosul
Yén hirup nu manfaat éta téh punjul
Poma ulah boga sipat loba wadul
Ngaku ibadah padahal huleng jentul
Sing inget di akhérat bakal ditimbang
Sakumna amal anu eukeur disorang
Salamet urang bakal meunang kasenang
Ladang gawé goréng kapaksa dibuang
Puguh ari milampah ibadah sholat
Geus jadi syaréat pikeun kabéh umat
Di mana lamun aya jalma teu to'at
Wayahna tobat bisi kaburu kiamat
Nya kitu lamun datang waktuna ngaji
Kudu macakal lantip tur sing taliti
Tong tepi ka nyapirakeun ka kyai
Nu ngawulang, pék sing adab sangkan ngarti
Mangsa tholab élmu poma tong takabur
Lungguh payuneun guru sing loba paur
Témbongkeun hurmat percaya kudu akur
Ajrih kana élmu-élmuna nu luhur
Jeung deui ka sadayana sing hariwang
Ka sepuh ulah wani sentak gantawang
Komo lamun anak geus wantun miwarang
Duh Gusti éta téh kacida teu meunang
Tah kitu ari nyanghareupan lalakon
Kudu imbang jeung tong ngarempak tetekon
Pan ku Gusti gé dipaparin papagon
Sangkan hirup bener sareng henteu jongjon
Ka sadaya nu maca ieu syairna
Muga-muga ku Gusti Alloh dibuka
Lawang rohmat nu manjing ka sadayana
Nempatkeun kana jalan nu dipikersa
Sareng muga-muga teras ditebihan
Tina kalepatan sipat kakufuran
Tah sakieu piwejang liwat nadhoman
Nyanggakeun ka sadayana ikhwan-ikhwan
Ieu mangrupa serat syair pépéling
Ti abdi nu bodo sugan jadi penting
Paranti panggeuing tur jadi babanding
Kana lakulampah waktos nu rék sumping
Sakieu serat nu janten panungtungan
Manan kaluman mending ngahiriringan
Bral geura cekap tamatan heula anan
Sugan-sugan ka payun nyusul terasan
Langganan:
Posting Komentar (Atom)
0 koméntar:
Posting Komentar
Hatur nuhun!