Ngeunaan Sim Kuring
Jumat, 30 September 2022
Laisali rohatun wala syifaun
Min tsaqo min ila biwaslil habibi
Laisali rohatun wala syifaun
Min tsaqo min ila biwaslil habibi
Taya kasenangan nu baris ngubaran
Anging patepang sareng anjeun pujaan
Sabab anjeun téh paranti ngiuhan
Dina sagalaning rupa karinduan
Héy angin nu ngahiliwir pangdugikeun
Salam abdi ka anjeunna talatahkeun
Carioskeun abdi cinta ka anjeunna
Jeung aya kembang katresna dina jiwa
Ombak anu tingjelegur di lautan
Nabrak kana karang di sisi lautan
Jeung gunung nu dilimpudan ku salju
Jadi saksi rindu abdi nu mahabu
Dina tengahing wengi meujeuhna sepi
Bari disaksian ku bulan sapasi
Dikiceupan ku remyang-remyangna béntang
Cahyana surem henteu pati caang
Mung sakitu abdi keur ngumbar lamunan
Jeung sawangan anu éndah kaalaman
Waktos duaan masih keur lalayaran
Sagalaning katresna kacintaan
Lalayaran dina sagalaning cinta
Anu éndah lain sulap lain béja
Sora cihcir ti peuting nu mawa getir
Kana diri abdi anu matak getir
Aya sora gaang semu ngawawaér
Bet ngahudangkeun kana haté kagéhgér
Sora jangkrik siga anu milu ceurik
Kana haté nu pinuh ku rasa ngerik
Bulan caang siga anu milu melang
Melang ka hiji bujang anu paanggang
Narik émutan tina kahariwang
Mugi rahayu keur béja nu datang
Anu tebih ti sim abdi héy panutan
Nanging salira tetep sobar ngantosan
Ngantos takdir nu lungsur ti Pangéran
Malah mandar laksana tinekanan
Dina waktos siang sok kagugunamkeun
Kitu deui mun wengi sok kaimpikeun
Nanging wayahna urang téh masing sobar
Sing émut kana qodo sinareng qodar
Ya Alloh pasihan abdi pitulung
Pikeun nandangan kisah nu gumulung
Di mana siang meujeuhna hurung nangtung
Paparin jalan sangkan teu kasarung
Cita-cita abdi sangkan laksana
Duaan calik dina singgasana
Harepan sim abdi bakal sampurna
Ku pangdu'a abdi sareng salira
Langganan:
Posting Komentar (Atom)
0 koméntar:
Posting Komentar
Hatur nuhun!